ЯҢАЛЫКЛАР
Туган көн һәрбер кешенең гомерендә истәлекле вакыйга, ә инде 9 дистәне тутыру ул аеруча күңелле мизгел. 18 февраль көнне Кече Битаман авылында яшәүче хөрмәтле якташыбыз Мәгъсүмҗан Галимҗан улы Галимҗанов та үзенең 90 яшьлек юбилеен каршы алды. Күркәм бәйрәм хөрмәтенә Мәгъсүмҗан абый туган-тумачасыннан, якыннарыннан гына түгел, Биектау районы, авыл җирлеге җитәкчелегеннән дә котлау һәм рәхмәт сүзләрен ишетте. Шушы көннәрдә пар канаты Нурания апа белән бергә матур, тигез гомер итүләренә дә 65 ел тулган. Россия Президенты Владимир Путин кул куйган Рәхмәт хатын, истәлекле бүләкләрне юбилярга район Башлыгы Рөстәм Кәлимуллин тапшырды.
2020 нче ел гаять катлаулы, шул ук вакытта кызыклы да булды. Биектау районында ул юбилей даталарын билгеләп үтү, үзгәрешләр һәм ныклы адымнар белән алга таба үсеш билгесе белән узды. Сайлаулар, үзара салым буенча референдумнар, инфраструктураның актив үсүе - вакыйгалар бер-берсен алыштырып кына тордылар.
Шәпше мәдәният йортында 2020 елга йомгак ясауга багышланган очрашу булып узды. Биредә Биектау районы Советының 6 нчы утырышы үткәрелде. Гадәттәгечә ел йомгаклары белән район Башлыгы Рөстәм Кәлимуллин таныштырды. Ул 2021 елга планнар турында сөйләде. Әлеге чарада Татарстан Республикасы Премьер-министры урынбасары, ТРның сәнәгать һәм сәүдә министры Альберт Кәримов катнашты.
Дөбьяз авылындагы Латыйповлар гаилә фермасында район күләмендә оештырылган күчмә киңәшмә узды. Аның эшендә Биектау районы хуҗалыклары җитәкчеләре, баш зоотехниклар һәм баш ветеринария табиблары, районның авыл хуҗалыгы һәм азык-төлек идарәсе белгечләре һәм идарә җитәкчесе Рәхимҗан Кәримов катнашты.
Әле шушы көннәрдә генә Бөреле җәнлек совхозында яшәүче Анна Гаврилова 95 яшьлек юбилеен билгеләп үтте. Ул тумышы белән Арча районыннан. Күпмедер еллар узганнан соң ул Биектау районына күченеп килгән һәм әле дә биредә яши. Гаиләдә дүрт бала үскән. Ни кызганыч, шул дүрт баланың хәзерге вакытта нибары берсе - олы кызы Нина гына исән. Юбилярны Биектау муниципаль районы Башлыгы Рөстәм Кәлимуллин һәм Бөреле гомуми урта белем бирү мәктәбе укучылары котлады.
Экология, табигатьтән файдалану, агросәнәгать һәм азык-төлек сәясәте комитеты утырышы узды. Парламентарийлар 2020 елда «2013-2025 елларга Татарстан Республикасында авыл хуҗалыгын үстерү һәм авыл хуҗалыгы продукциясе, чимал һәм азык-төлек базарларын җайга салу» дәүләт программасын үтәү нәтиҗәләре, шулай ук кайбер закон проектлары буенча фикер алыштылар. Утырыш эшендә Дәүләт Советы Рәисе урынбасары Марат Әхмәтов катнашты.
Социаль сәясәт комитеты һәм Мәгариф, мәдәният, фән һәм милли мәсьәләләр комитетының уртак утырышы узды, анда парламентарийлар республикада укучыларның кайнар туклануын оештыру мәсьәләләре турында җентекләп фикер алыштылар, шулай ук берничә закон проектын карадылар. Утырыш эшендә Дәүләт Советы Рәисе урынбасары Татьяна Ларионова, парламент Секретаре Лилия Маврина катнашты.
Атна дәвамында, 15-20 февраль көннәрендә республиканың барлык мәктәпләрендә республикада игълан ителгән Туган телләр һәм халыклар бердәмлеге елына багышланган "Татарстан - уртак йортыбыз. Халыклар бердәмлеге, мәдәниятләр һәм телләр төрлелеге – республиканың төп байлыгы" дип аталган парламент дәресләре узачак. Бүген Дәүләт Советында тарих, җәмгыять белеме һәм хокук, туган тел укытучылары өчен семинар узды, анда дәресне үткәрү тематикасы һәм методикасы турында фикер алыштылар. Педагоглар белән Дәүләт Советы Рәисе Фәрит Мөхәммәтшин очрашты.
Бүгенге көндә 16 меңләп кеше яшәүче Биектау авылында йортлар һәм социаль билгеләнештәге объектлар саны гына түгел, транспорт хәрәкәтендә катнашучылар саны да арта бара. Олы авылның проблемалары да олы була. Юллар киңәйтелмәгәнлектән, биредә машиналар бик күп җыела, юлтранспорт фаҗигаләре саны да кимеми. Биектау районында көненә 15ләп авария була. Юлтранспорт фаҗигаләренең сәбәбе нидә соң?
Без сукбай этләр турындагы язмаларыбызны дәвам иттерәбез. Красносельский авыл җирлеге башкарма комитеты җитәкчесе Илдар Газизов сүзләренә караганда, ел башыннан районда кешеләрне куркуга салучы этләр йөрүе турында берничә гариза килгән. Сукбай этләрне алда ни көтә һәм аларны юк итүдән тыш, башка алымнар бармы?