Яшьләрне «Чисталы сәфәр» экотурларында катнашырга чакыралар
Татарстан Республикасының Региональ яшьләр экология иҗтимагый оешмасы (РИЭИО) «Будет чисто» «Чисталы сәфәр» дип аталган экологик турлар сериясен башлап җибәрә. Проект төбәк халкының экологик җаваплылыгын арттыруга, шулай ук республикадагы аеруча саклана торган табигать территорияләренә (АСТТ) һәм истәлекле урыннарга системалы практик ярдәм күрсәтүгә юнәлдерелгән.
Сәяхәтләр форматы ике көнлек походларны, төн кунуны күздә тота. Бу сәфәрләр барышында катнашучылар Татарстанның гүзәл почмаклары белән генә танышып калмыйча, табигатьне саклауга да реаль өлеш кертәчәкләр: чүп-чарны җыеп алачаклар, туристлык территорияләрен төзекләндерәчәкләр һәм табигатьне саклау акцияләрендә катнашачаклар. Һәр тур программасы эчтәлекле булачак һәм үз эченә алачак:
- уникаль табигать объектлары буенча экскурсия программасын;
- танып-белү характерындагы экологик мастер-классларны;
- катнашучылар өчен спорт һәм иҗади активлыкларны.
Экоэкспедицияләр үткәрү графигы:
- «Дала» заказнигы (Лениногорск районы) — 2026 елның 4–5 июле;
- Югары Ослан авылы (Югары Ослан районы) — 2026 елның 11–12 июле;
- «Кичке-Тан» заказнигы (Әгерҗе районы) — 2026 елның 18–19 июле;
- «Чиста болыннар» заказнигы (Чистай районы) — 2026 елның 1–2 августы;
- Красновидово авылы (Кама Тамагы районы) — 2026 елның 15–16 августы.
Экспедицияләрдә әйләнә-тирә мохитне саклау мәсьәләләре белән мавыккан һәм җәяүле маршрутлар өчен җитәрлек физик әзерлеге булган 18 яшьтән өлкәнрәк яшьләр катнаша ала. Катнашу өчен ТР РИЭИО «Будет чисто» рәсми сайтында гаризаны тутырырга кирәк. Һәр аерым турга теркәлү аның башланыр алдыннан өч көн алдан ябыла. Катнашу шартлары Экотурлар уздыру нигезнамәсендә беркетелгән.
«Чисталы сәфәр» экологик турлары — ул табигатьтәге актив ял гына түгел, ә киң масштаблы табигатьне саклау хәрәкәтенең бер өлеше булу, туган якның уникаль урыннарын өйрәнү һәм аның табигать мирасын саклауга шәхси өлеш кертү мөмкинлеге дә.
Проект тармак ведомстволары һәм фондларның һәрьяклы ярдәме белән гамәлгә ашырыла. Турлар «Тыюлыклы Татарстан» экология-агарту проекты кысаларында уза, ул Табигать Президент фонды ярдәмендә тормышка ашырыла, шулай ук «Татарстанның Яшел коды» проекты кысаларында. Соңгысы 2025 елда Татарстан Республикасы Рәисенең гражданлык җәмгыятен үстерүгә грант акчаларын файдалану һәм Татарстан Республикасының Экология һәм табигый байлыклар министрлыгы ярдәме белән гамәлгә ашырыла.