Роспотребнадзор дача чорында үсемлекләрне сату кагыйдәләре турында хәбәр итә

Дача сезоны башлану белән бакча кишәрлекләре, яшелчә бакчалары һәм өйдә үстерү өчен үсемлекләр сатып алу актуальләшә. Роспотребнадзор үсемлекләрне сатуның Россия Федерациясенең Кулланучылар хокукларын яклау турындагы законнары таләпләре нигезендә гамәлгә ашырылуын искәртә.

Үсемлекләрне сатканда кулланучыга товарны дөрес сайлап алу һәм куллану өчен кирәкле һәм дөрес мәгълүмат бирелергә тиеш. Аерым алганда, үсемлекләр турындагы мәгълүматларда аларның төр атамалары, шулай ук аларны тоту һәм үрчетү үзенчәлекләре турында белешмәләр булырга тиеш.

Сатучы кулланучыларга товарның бәясе турындагы мәгълүматны сумнарда җиткерергә тиеш.

Россия Федерациясе территориясенә кертелгән кыргый үсемлекләрне сатканда, сатучы аларны ил территориясенә кертү хокукын раслый торган документның номеры һәм датасы турында белешмәләр бирергә тиеш.

Әгәр касса чегында йә товар өчен түләүне раслый торган башка документта сатып алынган үсемлекләрнең төр атамасы һәм саны турында белешмәләр булмаса, кулланучыга аның таләбе буенча товар белән бергә күрсәтелгән белешмәләр, сатучының исеме, сату датасы һәм товар бәясе белән товар чегы бирелергә тиеш.

Игътибар итәбез, үсемлекләр «кулланучылар хокукларын яклау турында»гы Законның 25 статьясында каралган нигезләр буенча алмаштырылырга тиешле сыйфатлы азык-төлек булмаган товарлар исемлегенә кертелгән. Шуңа күрә тиешле сыйфатлы үсемлекләр, формалары, зурлыклары, чәчәкләре яисә башка шундый ук сәбәпләр аркасында туры килмәсә, алмашынырга яки кире кайтарылырга тиеш түгел.

Шуның белән бергә, әгәр товарда кимчелекләр табылса, кулланучы сатучыга кулланучылар хокукларын яклау турындагы законнарда каралган таләпләрне дә куярга хокуклы.

Мәсәлән:

1. Әгәр үсемлектә аны кулланучыга тапшырган вакытта булган кимчелекләр, шул исәптән авыру билгеләре, корткычлар белән зарарлану, механик зарарлану яки башка кимчелекләр ачыкланса.
2. Әгәр үсемлекнең сыйфаты сатучы яки илтү хезмәте гамәлләре нәтиҗәсендә начарланган булса, кулланучы Кулланучылар хокукларын яклау турындагы законнарда каралган таләпләрне куярга хокуклы.
3. Әгәр кулланучыга үсемлекне дөрес сайлап алу, карап тоту һәм файдалану мөмкинлеген тәэмин итә торган кирәкле һәм дөрес мәгълүмат бирелмәгән булса.

Шуны да истә тотарга кирәк: әгәр сатучы кулланучыга үсемлекне карап тоту, саклау һәм карау кагыйдәләре турында тиешенчә мәгълүмат биргән булса, ә җитешсезлекләр кулланучы тарафыннан күрсәтелгән кагыйдәләрне бозу аркасында килеп чыккан икән, сатучы мондый җитешсезлекләргә бәйле таләпләрне канәгатьләндерүдән баш тартырга мөмкин.

Товарның җитешсезлекләре ачыкланганда кулланучы үз теләге белән хокуклы:

- товарны тиешле сыйфатлы товарга алыштыруны таләп итәргә;
- сатып алу бәясен тиешенчә киметүне таләп итәргә;
- сату-алу шартнамәсен үтәүдән баш тартырга һәм товар өчен түләнгән сумманы кире кайтаруны таләп итәргә;
- Россия Федерациясе законнарында каралган башка таләпләрне куярга.

Сатучы таләбе буенча һәм аның хисабына кулланучы товарны кимчелекләре белән кире кайтарырга тиеш. Бу чакта кулланучы сыйфатсыз товар сату нәтиҗәсендә китерелгән зыянны тулысынча каплауны таләп итәргә хокуклы.

Кулланучылар хокуклары бозылган очракта беренче чиратта сатучыга язма дәгъва белән мөрәҗәгать итәргә киңәш ителә. Әгәр бәхәс җайга салынмаган булса, кулланучы Роспотребнадзорга, аның территориаль органына мөрәҗәгать итәргә йә мөрәҗәгатьне Роспотребнадзорның рәсми сайты аша җибәрергә хокуклы.