Куркачи авылында мәктәпкә капиталь ремонт бара
Объектның әзерлеге бүгенге көндә 60%тан артып киткән. Бу хакта үзенең социаль челтәрләрендә Югары Ослан районы Башлыгы Равил Хисамутдинов хәбәр итте.
Милли проектлар кысаларында алып барылган эшләр барышында 1970 елларда төзелгән мәктәп бинасы яңа техник база гына түгел, ә уникаль архитектур кыяфәт тә алачак. Район башлыгы сүзләренә караганда, һәр шундый объект өстендә эшләгәндә үз «үзенчәлекле ягын» табу бурычы куела. Куркачи мәктәбе өчен ул — якты төсләрдәге фасадны күркәм агач бизәкләр белән яраштыру һәм пыяла гөмбәз астында чын кышкы бакча булдыру.
«Без балачакта безнең балалар өчен бүгенге кебек шартлар турында хыяллана да алмый идек. Без аларның белем алуы заманча, якты һәм матур шартларда баруы өчен барысын да эшлибез. Бу — бөтен авыл, район һәм республика горурланачак объект булачак!» — дип ассызыклады Равил Хисамутдинов.
Хәзерге вакытта төзүчеләр эчке инженерлык челтәрләрен монтажлауны тәмамлыйлар. Фасад эшләре диярлек төгәлләнгән, бина эчендә линолеум җәяләр һәм плитәләрне идеаль хәлгә китерәләр.
Ремонт барышында укучылар өчен уңайлы мохит булдыруга аерым игътибар бирелә. Мәктәптә 180нән артык бала белем ала, һәм алар, район җитәкчелеге сүзләренчә, иң яхшысына хаклы. Спорт залында да яңа дәрәҗәдә шөгыльләнү мөмкинлеге бирәчәк эшләр алып барыла.
Әлеге проектны тормышка ашыру — кеше капиталын үстерүгә юнәлдерелгән дәүләт сәясәтенең турыдан-туры нәтиҗәсе.
«Безнең республика һәм ил җитәкчелеге үсеш векторы билгеләде, кешенең, һәм беренче чиратта, баланың төп кыйммәт булуын ассызыклады. «Балалар өчен барысы да» дигән сәясәт практикада эшли: милли проектлар, аерым алганда «Гаилә» милли проекты ярдәмендә, безнең авыллар күзгә күренеп үзгәрә», — дип билгеләп үтелә хәбәрдә.
Яңа Куркачи мәктәбе авыл халкы өчен чын мәгънәсендә тарту үзәгенә һәм горурлыкка әвереләчәк, авыл җирлегендә тормышны уңайлырак һәм заманчаларак итәчәк.