Физкультурадан тематик белем бирү эшчәнлеге “Водолазлар ярдәмгә ашыга”

   Балаларга иртәнге якта тәрбияче апалары Энҗе Рәшит кызы “Сак бул, юка боз”, “Сулыкта үзеңне ничек тотарга” дип исемләнгән слайдлар ярдәмендә әңгәмә үткәрде. Интерактив тактада “Чаңгычыга иң куркынычсыз юл” дип исемләнгән  уен ярдәмендә балалар слайдтагы картина ярдәмендә чаңгычыга дөрес юл күрсәттеләр. Әңгәмәгә “Юка боз куркыныч” дип исемләнгән видео-өзек карап йомгак ясалды. Сөйләм теле эшчәнлегендә балаларга водолаз һөнәре турында мәгълүматлар сөйләнде. Балалар водолаз булу өчен кыю, батыр, көчле, җитез булырга кирәк дип нәтиҗә чыгардылар. Бу алган белемнәр физкультурадан  “Водолазлар ярдәмгә ашыга” дигән тематик белем бирү эшчәнлегендә ныгытылды. Шушы сыйфатларны балаларда күрү өчен төрле уеннар уйнадык. Алар: “Ишкәк аяклар белән йөгерү”, “Батучыны коткар” (кыршау ярдәмендә балалар суда батучы баланы коткардылар), “Авырлыкларны җиңү” (гимнастик эскәмиядә шуып барып, коткару боҗрасы һәм аякка ишкәк аяклар киеп йөгерү), “Иң яхшы йөзүче” (коткару боҗрасы киеп гимнастик эскәмия буйлап йөгерү). Балаларга үзләрен водолаз кебек тою бик кызыклы булды.Көннең икенче яртысында балалар “Куркынычсызлык әлифбасы” дигән видео-өзек карадылар. Бу өзектә балаларга сулыкларда, бозда үз-үзеңне тоту кагыйдәләре турында аңлаттылар.Кичке якта ата-аналар белән консультациялар оештырылды. Ата-аналар өчен күчмә папкага “Көзге боз өстендә сак булыйк” дип аталган мәгълүмат куелды. Һәм балаларны сулыкларда, бозда игътибарсыз калдырмау, балалар тормышы һәм сәламәтлекләре өчен җаваплылык турында белешмәлелек белән таныштырып кул куйдырылды.