Прокуратура табиб һәм аның гаиләсен үтерүчеләр өчен 38 ел сорый
2000 елда Казан тире-венерология диспансеры баш табибы Ринат Әхмәдиев һәм аның гаиләсе явызларча үтерелгән иде. Шикле адәмнәрне Татарстан Югары судында хөкем итәләр.
Прокуратура гаепләнүче ике ир-атның да 19ар елга ирекләреннән мәхрүм ителүен сораган. Дәүләт гаепләүчесенең үтенече буенча, гаепләнүчеләр аның беренче 5 елын – төрмәдә, ә калган срокны кырыс режимлы колониядә уздырырга тиеш.
Исегезгә төшерәбез, җинаятьчеләрнең корбаны дүрт кеше булган иде. Алар – 40 яшьлек гаилә башлыгы, аның 6 һәм 9 яшьлек ике улы, шулай ук Әхмәдиевнең танышы – 44 яшьлек хатын-кыз. Явыз бәндәләр аларны үтергәннән соң йортка ут төртеп, эзләрен яшерергә тырышулары хакында да хәбәр ителгән иде.
Шикле адәмнәрнең икесен дә узган ел кулга төшерделәр. Өченчесе вафат булган, диелде.