Казанда авыл батырлары бәйгесе тәмамланды 3нче өлеш

130 килолы егетләр ярышында чемпион булып Лениз Абдуллин танылды. Дөрес­рәге, аның көндәше Рөстәм Мухамов бил алышып та тормады. Дәүләр бәйге­сен­дә исә Ильяс Галимов җи­ңү яулады. Иң җитди алыш исә аларга кадәр 100 килолы егетләр арасында булды. Хәер, аңа кадәр зур вакыйгалар булып, Радик Сәлахов, Ринат Әх­мәтшин, Муса Галлә­мов һәм башка көчле егетләр үзара бил алышып, көрәштән тө­шеп калган иде инде. Ә Әл­мәттән Айвар Билалов белән Теләчедән Раил Нургалиев арасындагы алыш татар көрәшенең бүгенге хәлен ачып салды. Матур ягын да, ямьсез, оят тарафларын да. Матур ягы шул: Айвар да, Раил дә – милли спорт төрендә иң көчле егетләр, икесе дә бөтен дөньяга күрсәтерлек батырлар. Ә менә алар катнашындагы алыш, дөресрәге, аның тирәсендәге хәлләр янә шау-шу чыгарды. Бер яктан, кискенлек аңлашыла. Айвар­ның былтыргы титулын сак­лап каласы, Раилнең узган елгы өченче урыннан берен­чегә күтәреләсе килде.

Әмма мәйданда ике батыр түгел, аларның командалары да бил алыша. Әлмәт тә, Теләче дә беренче урын өчен тырыша. Әнә шул теләкләр бергә килеп кушылгач, келәм тирә­сендә ыгы-зыгы килеп чыкты. Үпкәләр белдерелде, ямьсез сүзләр күп әйтелде. Ә бит бу егетләрнең бергә келәмгә чыгасы, республика данын яклыйсы да бар. Нишлисең, көрәшчеләр – җиңелә, ә хөкемдарлар үз сүзен кистереп әйтә белми. Көрәш ул йөгереш түгел. Җи­ңүчене финиш сызыгына карап кына билгеләп булмый. Шуңа күрә хөкемдарлар да ялгышырга, “бу бирде бит, теге нигә бирмәде” кебек дәгъвалар да булырга мөм­кин. Әмма судьялар карар чыгарганда, алар тирәсенә нигә дистәләгән кеше җыела? Казанда милли көрәш турнирлары уза торган “Ак барс” комплексы – бик уңайлы корылма. Теләсә нинди дәрә­җәдәге кунак өчен. Шуңа күрә, мөхтәрәм хөрмәтле кунаклар да, трибунага менеп, андагы махсус йомшак кә­нәфигә менеп утырса, алар­ның үзләренә дә, көрәшчеләр белән хөкемдарларга да уңай­лырак булыр иде.

“Хө­кемдарларга нигә басым ясаламы? Бу сорауны кычкырышып йөргән кешеләргә би­рергә кирәк, – диде татарча көрәш буенча республика федерациясе башкарма директоры Равил Хәйруллин. – Ә көрәшчеләрне ничек тәр­типкә утыртыргамы? Кайбер егетләрдә “йолдыз” чире башлана. Алар үз осталыкларын арттыру белән күбрәк шөгыльләнсә, келәмдә судьяларга азрак сүз әйтелер иде. Мәрхүм Мәгазь абыйның (легендар тренер Сәхәбетдинов турында сүз бара – ред.) әйтә иде: көрәшкән вакытта көн­дәшеңне чиста җиңсәң, көрәшеп йөрисе дә юк. Андый чакта беркем берни әйтә алмый. Көрәш бит ул дүрт минут бара. Ахырга кадәр көрәшергә кирәк”.