Казанда авыл батырлары бәйгесе тәмамланды 1нче өлеш

55 командадан 355 көрәшче чыгыш ясаган турнирның ахыргы өлеше аеручы кызу булды. Финаллар җиткәч көндәшлек артканга гына түгел. Җиңелүчеләр – җиңелә, ә хөкемдарлар үз сүзләрен кистереп әйтә белмәү аркасында да. Бу юлы да әнә шундый хәлләр булды. Ә бит аларның кабат бер келәмгә чыгасы да бар. Татарстан Авыл хуҗалыгы һәм азык-төлек министрлыгы призларына милли көрәш ярышы быел 20нче мәртәбә оештырылды. Тәүге тапкыр 1995 елда узган бәйгенең беренче җиңүчеләре булып Миңнерахман Ваккасов, Рафак Хәлиуллин, Вакыйф Тимербаев, Гомәр Гәрәев, Рафил Әхмәтханов, Владимир Николаев, Марсель Таһиров, Вил Усманов, Рамил Җамалетдинов, Илдар Рәфыйковлар таныла. Ә командалар беренчелеген Балтач егетләре ота. Бу район командасы әлеге турнирда барлыгы дүрт тапкыр җиңү яулаган. Теләче – өч, Арча белән Кукмара – икешәр тапкыр уңышка ирешкән. Актаныш белән Биектау егетләре дә берәр мәртәбә кубок алып кайтып киткән. Ә менә әлмәтләр команда беренчелеген сигез тапкыр (1998, 2000, 2004, 2008, 2009, 2011, 2013, 2014 еллар) откан. Алга китеп булса да, шуны әйтергә кирәк: быел алар тугызынчы мәртәбә уңышка иреште. Икенче урынны Теләче көрәшчеләре алды. “Ак барс-Әгерҗе” өченче калды. Әмма иң нык сөенүчеләр арчалар булгандыр мөгаен. Алар бу ярышта дүртенче урынны алды. “Без үзебезнең егетләр белән уңышка ирештек. Әлмәт белән Теләчедә чит­тән килгән егетләр күп. “Ак барс-Әгерҗе” дә – җыелма команда ул. Ә бездә андыйлар юк”, – диеште былтыр бишенче булган Тукай якташлары. 
"Интертат" республика электрон газетасы