Биектау районында “Татарстан Республикасы рус милли-мәдәни берләшмәсе”нең региональ иҗтимагый оешмасы бүлеге оештырылды

Рәис итеп  Усад мәдәният йорты директоры булып эшләүче Наталья Вәлиуллина сайланды. Рәис урынбасарлары – Усад авылындагы Изге Троица чиркәве рухание Виталий Ульянов һәм Шәпше авыл җирлеге башкарма комитеты җитәкчесе вазифаларын башкаручы Владимир Беляков, секретаре – үзәк китапханәнең хезмәт күрсәтү бүлеге мөдире Ирина Князева. Утырышта шулай ук  бүлекнең төп комиссияләре рәисләре сайланды һәм якындагы чорга эш планы төзелде.

“Татарстан Республикасының рус милли-мәдәни берләшмәсе”нең төп бурычлары – рус халкының гореф-гадәтләрен  саклауга һәм үстерүгә булышлык итү, рус телен, халык авыз иҗатын саклау турында кайгырту, оешма планнарын тормышка ашыру өчен иганәчеләр җәлеп итү, талантлы яшьләргә ярдәм кулы сузу һәм башкалар.