Эшмәкәрләр уңай социаль мохиткә мохтаҗ
Татарстанга кече һәм урта эшмәкәрлек вәкилләрен җәлеп итү өчен икътисадны камилләштерү генә түгел, ә уңай социаль мохит тудыру да таләп ителә. Республика малтабарлары арасында оештырылган сораштырудан күренгәнчә, алар эшләү өчен урын сайлаганда, беренче чиратта, яшәү шартларының нинди булуына игътибар итә...
Бүген Иннополис шәһәрендә “Татарстан – бизнес өчен таяныч” дип аталган россиякүләм форум үз эшен башлап җибәрде. Беренче мәртәбә генә уздырыла торган форумның пленар утырышы тулысы белән Татарстанга бизнес вәкилләрен җәлеп итү чаралары турында үзара фикер алышуга багышланды. Чара республика Президенты вазифаларын вакытлыча башкаручы Рөстәм Миңнеханов катнашында үткәрелде.
Авылда бакчасы булган һәркем - эшмәкәр
- Хәзерге вакытта Татарстанда 3,8 миллион кеше гомер кичерә. Без тагын 2-3 миллион кеше кабул итәргә әзер. Тик моның өчен республикада кече һәм урта эшмәкәрлек тармагына карашны тулысынча үзгәртү кирәк. Без бу тармакка ярдәм итү турында күп сөйлибез, тик әлеге өлкәдәге вәзгыятьне тамырдан үзгәртерлек карарлар кабул ителми, - дип ассызыклады Рөстәм Миңнеханов үзенең чыгышында.
Татарстан лидеры сүзләренә караганда, хәзерге вакытта бу өлкәдәге төп проблема – хакимият һәм бизнес арасында күпер булмау. Бүгенге көндә әлеге ике тармак бер-берсеннән аерылган.
- Форум мәйданчыклары безгә үзара аралашу, эшчәнлегебезгә төзәтмәләр кертү мөмкинлеге бирә. Әгәр “бездә барысы да яхшы, проблемалар юк” дип әйтсәк, бер урында тукталып калачакбыз дигән сүз, - диде Рөстәм Миңнеханов.
Кече һәм урта эшмәкәрлек турында сөйләгәндә, авыл җирлегендә эшләүчеләргә аеруча зур игътибар бирү сорала.
- Шәхси ярдәмчел хуҗалыкларны гына алыйк... Гомумән, авылда бакчасы, малы булган һәркем – эшмәкәр. Аларга бирелгән кредитларның кайтарылу дәрәҗәсе 99 процент тәшкил итә. Әгәр дә без авылларда кече һәм урта эшмәкәрлек вәкилләре өчен шартлар тудырсак, бу уңышка китерәчәк. Халыкны авылларда калдыру өчен исә тиешле инфраструктура булдыру: балалар бакчалары, мәктәпләр ачу, юллар төзү таләп ителә,- дип белдерде Татарстан лидеры.
“Опора России” иҗтимагый оешмасы президенты Александр Калинин форум делегатларына июнь аенда Татарстан эшкуарлары арасында уздырылган сораштыру нәтиҗәләрен тәкъдим итте. Тикшеренүдән күренгәнчә, малтабарлар эш урыны эзләгәндә төбәктәге икътисад үсешенә генә түгел, ә социаль мохитнең камиллегенә дә зур игътибар бирә икән. Эшмәкәрләр икътисади үсешнең мөһимлегенә 5 баллдан 3,7 балл куйса, уңай мохитне 3,5 балл белән бәяләгән.
Җиңелмәс өчен Татарстаннан үрнәк алсыннар...
Александр Калинин китергән саннарның гамәли яктан дөрес булуын төсле металл һәм эретмәләр җитештерү белән шөгыльләнә торган “Феникс” оешмасының Директорлар советы башлыгы Марина Блудян да ассызыклады.
- Төбәкне бизнес-мигрантларга кызыклы итү өчен, беренче чиратта, аларны уңайлы, рәхәт тормыш белән тәэмин итү кирәк. Безнең компаниядә андый очраклар булгалады: хезмәткәрләр торак яки көнкүреш инфраструктурадан канәгать булмыйча, анда күченүдән баш тартты, - дип сөйләде җитәкче.
Россия Икътисади үсеш министрлыгының кече һәм урта эшмәкәрлекне үстерү департаменты директоры Наталья Ларионова сүзләренә караганда, Татарстанда бизнес белән шөгыльләнү өчен барча мөмкинлекләр дә бар һәм ул башка төбәкләр өчен шактый җитди көндәш.
- Татарстан “бизнес өчен Мәккәгә әверелдекме?” дигән сорауга күптән инде “әйе” дип җавап бирде. Хәзер исә республика бу эшкә Россиянең башка төбәкләрен дә өйрәтә, - дип белдерде министрлык вәкиле.
Наталья Ларионова сүзләренә караганда, хәзерге вакытта республика җитди сәнәгый компанияләрне җәлеп итәргә сәләтле. “Ә башка төбәкләр бу эшнең барышын күзәтсеннәр һәм шуны ук эшләсеннәр. Югыйсә, әлеге көрәштә җиңеләчәкләр”, - дип белдерде җитәкче.
Шунысын да билгеләп үтәбез, хәзерге вакытта Татарстанда 140 меңнән артык кече һәм урта эшмәкәрлек субъекты бар. Аларда 480 меңнән артык кеше хезмәт куя. Республикадагы тулаем төбәк продуктының 25 проценты нәкъ менә алар өлешенә туры килә. Илдә катлаулы икътисади вәзгыять урнашуга карамастан, республикада эшмәкәрләргә ярдәм итү чараларының берсе дә кыскартылмады. Әле алай гына да түгел, Татарстан бизнес белән шөгыльләнү өчен иң уңайлы төбәкләр исемлегендә алдынгы урыннарның берсен тота. Кече һәм урта эшмәкәрлек субъектлары күләме буенча исә республика иң яхшы 10 төбәк исемлегенә кертелгән.
“Татарстан – бизнес өчен таяныч” форумы ике көн дәвам итәчәк. Анда илнең 40 төбәгеннән 165 делегат катнаша. Аларның барысы да “Опора России” иҗтимагый оешмасының төбәк лидерлары.
Рәмзия ЗАКИРОВА. Ринат НӘҖМЕТДИНОВ фотолары