Җәйге кампус: яшьләр идеяләре белән уртаклаша

Хәтерләсәгез, беренче тапкыр Җәйге кампус Татарстанда моннан өч ел элек үткәрелгән иде. Ул чагында оештыручылар аны ел саен Россиянең төрле төбәкләрендә уздырырга планлаштырды. Тик соңрак әлеге чараны һәр елны Татарстанда уздыру карары кабул ителде.

- Безгә сездә бик ошый. Җәйге кампусны алга таба да Татарстанда үткәрәсе килә, - дип бу юлы да Рөстәм Миңнехановка мөрәҗәгать итте Владимир Мау.

Быелгы чараның төп яңалыгы – Җәйге кампус беренче мәртәбә Иннополис шәһәрендә уздырылды. Исегезгә төшерәбез, бу тәкъдимне узган елгы кампус вакытында Рөстәм Миңнеханов шәхсән үзе керткән иде.- Җәйге кампус һәм федераль дәрәҗәдәге иң эре IT-проект булган Иннополис киләчәктә бергәләшеп эшләргә тиеш. Әлеге мәйданда ил үсеше өчен мөһим булган заманча идеяләр тормышка ашырылачак. Иннополис эшләнмәләре дөнья базарында да зур роль уйнар дип уйлыйбыз. Быелгы кампуста катнашучы студентлар белән тиздән нәкъ менә Иннополиста очрашачагыма ышанам, - дип белдергән иде Рөстәм Миңнеханов ул чагында.

Татарстан лидерының өметләре акланды: IV халыкара форумда катнашучылар быел Иннополиска җыелышты.

- Җәйге кампус һәм Иннополис - яшьтәшләр. Без беренче форумны 2012 елда уздырган идек. Иннополиска да нигез ташы нәкъ менә шул елны салынды, - дип белдерде кампусны ачу тантанасында Владимир Мау.

Җитәкчеләр Иннополиска дәшә

Рөстәм Миңнеханов быелгы чараның шактый үзенчәлекле булуын ассызыклап узды.

- Җәйге кампусны дүртенче ел рәттән кабул итү безнең өчен зур мәртәбә. Әлеге чараны Иннополис проектын эшләтеп җибәргән елны уздыру исә аны тагын да үзенчәлеклерәк итә. Бу – бик җитди мәйданчык һәм без аңарга зур өметләр баглыйбыз. Тиздән биредә куәтле, федераль дәрәҗәдәге IT-үзәк барлыкка килергә тиеш. Моның өчен Иннополиста барча мөмкинлекләр дә тудырылган, сезнең кебек акыллы, алдынгы карашлы яшь көчләр генә җитми. Шуңа күрә – рәхим итегез! - дип залда утыручыларга мөрәҗәгать итте Татарстан лидеры.

Николай Никифоров та үзенең чыгышында яшьләрне Иннополиска чакырды.

- Россиядә яшьләр өчен бик зур мөмкинлекләр тудырыла. Иннополис – шуларның берсе. Хәзерге вакытта без Россия төбәкләрен үстерү, камилләштерүгә зур игътибар бирәбез, шуңа күрә мин сезгә Иннополистагы вакансияләрне күзәтеп барырга, үз проектларыгыз турында уйланырга киңәш итәр идем. Хәзер илебездә шәхси компанияңне булдыру өчен барча мөмкинлекләр дә бар, - дип ассызыклады Россия министры.

Быелгы Җәйге кампусның мәртәбәле кунакларының берсе – Россия Сбербанкының идарә рәисе Герман Греф иде. Ул форум делегатлары каршында махсус лекция белән чыгыш ясады. Герман Греф сүзләренә караганда, Татарстан җитәкчелегенең икътисадны үстерү өлкәсендәге тәҗрибәсе Россиянең күп регионнары өчен үрнәк.

- Заманча икътисадны үстерүнең ысуллары төрле. Бу өлкәдә Татарстан күпләр өчен үрнәк. Биредә республика икътисадының моделен XXII гасыр нигезләренә таянып төзергә тырышалар, - дип белдерде Герман Греф.

Элиталы форум нинди була?

Шунысын да билгеләп узу мөһим: әлеге чара яшьләр арасында шактый популяр, хәтта элиталы булып санала икән. Бирегә эләгергә теләүчеләр шактый күп, ди. Шуңа күрә кампуста катнашу мөмкинлеге алу күпләр өчен көтелмәгән бүләк булган. Мәсәлән, Азалия Садриева шундыйларның берсе. Хәзерге вакытта ул КФУда белем ала, белгечлеге - дөньякүләм икътисад белән бәйле.

- Форум турында миңа дус кызым сөйләде. Дөресен генә әйткәндә, бу чара турында ишеткәнем бар иде инде. Бүгенге көндә ул яшьләр арасында бик популяр форумнардан санала. Бирегә эләгү шактый катлаулы. Өстәвенә, бер тапкыр катнашкансың икән, яңадан гариза бирү мөмкинлеге юк. Шуңа күрә бу чара миңа бик күпне бирер дип өмтеләнәм. Өстәвенә, чараның төп темасы, беренче чиратта, шәхси сыйфатларны үстерү, камилләштерүгә корылган, - дип сөйләде безгә Азалия.

Барселонадан ук килгәннәр

Шунысын да билгеләп үтү кирәк, Җәйге кампуста катнашырга теләүчеләргә иң төп таләпләрнең берсе – инглиз телен камил белү. Ник дигәндә, биредә Россиядән генә түгел, ә ерак чит илләрдән дә вәкилләр бар. Мәсәлән, Давид Бертрам Испаниянең Барселона шәһәре университетында белем ала.

- Мин быел икенче курсны тәмамладым. Белгечлегем исә философия фәне белән бәйле. Форум турында мин Мәскәүдәге дустымнан ишеттем һәм катнашып карарга булдым. Бу кампус белән элемтәгә керергә әтием ярдәм итте. Миңа калса, бу – шактый кыйммәтле тәҗрибә. Моңа кадәр Россиядә булганым юк иде әле, ниһаять, андый мөмкинлек туды, - дип сөйләде Давид Бертрам.

Тагын бер кызыклы факт: бирегә ул бертуган абыйсы белән килгән. Абыйсы Барселона университетының икътисад факультетында белем ала.

Татар телен үстерү өчен...

Ә менә Казан егете Азат Кашапов яшьләр арасында татар телен популярлаштыру турында хыяллана. КФУның мәгълүмати технология һәм системалар факультетында белем алучы бу егет социаль челтәрләрнең берсендә “Типичный татарин” дигән төркем оештырып җибәргән. Кампуска гариза биргәндә дә, ул шушы проектны тәкъдим иткән.