Башкалада укучыларны олы тормышка озаттылар
Бүген Казанда 5,5 мең укучы өчен “Соңгы кыңгырау” чыңлады. Мәктәптә узган тантаналы линейкалардан соң башкалабызның барлык чыгарылыш сыйныф укучылары “Казан -Арена” стадионы каршындагы ачык мәйданда җыелды. Биредә олы юлга атлаучы кызлар-малайлар өчен бәйрәм чарасы үтте.
Башкалабызда мәктәпне тәмамлаучылар өчен гомумшәһәр күләмендәге бәйрәм оештыру матур гадәткә әверелде. Узган ел шәһәр җитәкчелеге малай-кызларга теләк-фатихаларын Универсиада авылында җиткергән иде. Быелгы күңел ачу чарасы өчен “Казан-Арена” стадионы мәйданы сайланган.
Бәйрәмдә чыгарылыш сыйныф укучыларыннан кала мәктәп директорлары, 250дән артык сыйныф җитәкчесе, ата-аналар, Суворов училищесы кадетлары катнашты. Тәртип һәм иминлекне 600 полиция хезмәткәре тәэмин итте.