Татарстан республика территориясендә партнерлык (ислам) финансларын үстерү проектын гамәлгә ашыруда актив катнашты
Агымдагы елның 1 сентябреннән Дагестанда, Чечняда, Башкортстанда һәм Татарстанда ислам банкингын гамәлгә кертү буенча ике еллык эксперимент старт алды. РФ Хакимияте тиешле законны 2023 елның җәендә кабул итте.
Миңнеханов сүзләренчә, федераль закон кабул итү халыкның һәм бизнесның Ислам финансларына кызыксынуын стимуллаштырган. Базарда катнашучылар мәгълүматлары буенча, 2023 елда килешүләр саны 2022 ел нәтиҗәләреннән ике тапкыр артык булган.
"Партнерлык финанс тармагы-дөньяда иң тиз үсә торган тармакларның берсе. Әлбәттә, бу инструментлар безнең илдә кирәк һәм өстәмә инвестиция ресурсларын җәлеп итәргә мөмкинлек бирәчәк... партнерлык финансларын үстерү – ислам илләре белән хезмәттәшлек итү өчен мөһим корал. Бу Россия Федерациясе Президентының халыкара мөнәсәбәтләрне үстерүнең стратегик юнәлеше", - дип билгеләп үтте ул.
Татарстан вице - премьеры-икътисад министры Мидхәт Шаһиәхмәтов хәбәр иткәнчә, хәзерге вакытта кайбер кредит оешмалары һәм финанс компанияләре партнерлык финанслары өлкәсендә хезмәт күрсәтә: куллану һәм бизнес-финанслау, рассрочка шартларында торак финанслау, шәригать таләпләренә туры китереп лизинг, инвестиция килешүләре һәм пай фондлары аша акча кертү. "Ак Барс банк" һәм Сбер партнерлык финанслары принципларына туры килгән дебет картасын тәкъдим итәләр.
Министр эксперимент чорына Татарстанда партнерлык финансларын үстерү буенча чаралар планын тәкъдим итте. Юл картасы, аерым алганда, партнерлык финанслары өлкәсендә халыкның һәм бизнесның мәгълүматлылыгын һәм финанс грамоталылыгын арттыруны, белгечләр әзерләүне, тәкъдимнәр кертүне (шул исәптән норматив җайга салу буенча), базарны һәм финанс инфраструктурасын үстерүне, партнерлык финанслары принциплары буенча проектларга инвестицияләр җәлеп итүне, халыкара хезмәттәшлекне киңәйтүне үз эченә ала.
Чыганак: РИА яңалыклар