Радио көне белән!

7 нче май – Радио көне.  1895 нче елда нәкъ менә шушы көнне рус галиме  Александр   Попов   үзе   ясаган радиоалгычны күрсәтеп,  доклад белән чыгыш ясый. 


Ярты гасыр узгач, 1945  елның 7 маенда СССРда радио  барлыкка килүнең 50 еллыгы бәйрәм итү  үзенчәлекле, чөнки бу вакыйга фашистлар Германия-сенә каршы  сугышның Җиңү белән тәмамлану вакытына туры килә. Хөкүмәт, радионың җәмгыятьнең  мәдәни һәм  сәяси тормышындагы, ил оборонасындагы ролен исәпкә алып, 7 нче майны ел да билгеләп үтелә торган Радио көне итәргә дигән карар чыгара. Соңрак әлеге көн барлык элемтә тармакларында эшләүчеләрнең рәсми бәйрәменә әверелде.

Элемтә  тармагының безнең районда  үсеш алуы куанычлы хәл.  Бездә дә радио  барлыкка килде, сигналларны тапшыруда яңа заманча технологияләр кертелә. 100,2 FM дулкынында  эшләүче “Биектау FM” радиосын  радиоалгычларда гына түгел,  җирнең теләсә кайсы ноктасында  Интернетта да тыңларга мөмкин.  Радиотапшыруларны алып баручыларыбыз Эльвира Ибраһимова, Лилия Габдрәшитова, Гүзәлия Вафина  үз хезмәтләрен уңышлы башкаралар.  Барлык техник чараларның көйле эшләвен техник директор  Азат Гобәйдуллин тәэмин итә.

Барлык элемтәчеләрне, радио хезмәткәрләрен һәм   “Биектау FM” радиосын тыңлаучыларны  Радио көне белән котлап, сезнең тормыш дулкыннарыгызда һәрвакыт күңелле, шатлыклы яңалыклар  гына булуын  телибез. Һәркайсыгызга  нык сәламәтлек, бәхет-шатлыклар, җан тынычлыгы, күңел күтәренкелеге, иҗади уңышлар юлдаш булсын.