Район башлыгы урынбасары Раушан Хәйруллина, Бәдерниса Сәлах кызын 90 яшь юбилее белән котлады
2012 елның 28 сентябре, җомга
Районда озак яшәүчеләрне өйләренә барып, олуг гомер бәйрәмнәре – туган көннәре белән котлау матур гадәткә әйләнеп бара. Чираттагы юбиляр Биектау авылында яши.Быел озак яшәүчеләр арасыннан иң беренче булып котлауларны Кече Солабаштан Гайзелниса апа Насыйбуллина кабул итте. Күптән түгел матур гомер бәйрәмнәрен Ташлы Кавал авылыннан Кәримә апа Бикчәнтәева һәм Дөбъяз авылыннан Наилә апа Сибгатуллина билгеләп үттеләр. Аларның һәркайсы заманында тырышып эшләгән, балалар тәрбияләп үстергән, оныкларын һәм оныкчыкларын тәрбияләргә булышкан. Үз җилкәләрендә күп авырлыкларны күтәргән өлкән буынның әлеге вәкилләре һәрвакыт җәмгыятькә файда китерергә омтылган.
Чираттагы юбиляр Бәдерниса Сәлах кызы Әхмәтова, аңа 22 сентябрьдә 90 яшь тулды. Тумышы белән ул Әлдермеш авылыннан булса да, инде күп еллар Биектауда яши. Бирегә, Зеленая урамына аны матур гомер бәйрәме – юбилее белән котларга район башлыгы урынбасары Раушан Хәйруллина, Биектау авыл җирлеге башлыгы Геннадий Беспалов, авыл җирлеге башкарма комитеты секретаре Зөлфия Кузьмина килделәр. Алар әбигә Россия Федерациясе Президенты Владимир Путиннан һәм район башлыгы Рөстәм Кәлимуллиннан котлау хатларын тапшырдылар.
Бәдерниса Сәлах кызы өч бала тәрбияләп үстергән – бер кыз һәм ике ул, аның дүрт оныгы һәм җиде оныкчыгы бар. Бәдерниса апага, Бөек Ватан сугышында катнашучының тол калган хатыны буларак, күптән түгел генә уңайлы фатир биргәннәр, ә әлегә ул үз йортында яши. Туксан яшьлеге көнендә юбилярга бүләкләр тапшырылды.
Рәсемдә: Бәдерниса Әхмәтованы юбилейлы туган көне белән район башлыгы урынбасары Раушан Хәйруллина һәм Биектау авыл җирлеге башлыгы Геннадий Беспалов котлыйлар.
А.Тимонин фотосы.
Биектау хәбәрләре
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Хата таптыгызмы?
Сүзне яки җөмләне билгеләгез һәм CTRL+ENTER басыгыз